नेपाल कालो सूचीमा पर्ने खतरा तत्काललाई टर्‍यो

२ फागुन, काठमाडौं । कालो धनलाई सेतो बनाउन रोक्ने कानुन निर्धारित समयमै पारित नगरे पनि नेपाल तत्कालै कालो सूची (नकरात्मक सूची) मा नपर्ने भएको छ ।

मुद्रा निर्मलिकरण अनुगमन गर्न बनेको अन्तरसहकारी बित्तिय कार्यदल (एफटीएफ)ले सोमबारसम्म कानुन पारित गर्न समय दिएको भएपनि सत्ताधारी एकीकृत नेकपा माओवादीको वैद्य पक्षले बिरोध गरेका कारण कानुन परित हुन सकेको थिएन् ।

यसरी समयमै कानुन पारित गर्न नसक्ने मुलुकलाई नकरात्मक सूचीमा पार्ने एफटीएफको प्रचलन रहेपनि नेपालले कुटनीतिक पहल गरि थप समय मागेका कारण तत्काल नकरात्मक सूचीमा नपर्ने निश्चीत भएको उच्च सरकारी स्रोतको दावी छ ।

‘नेपालले कानुन पारित गर्न चाहेपनि समयमै कार्यसम्पन्न हुन नसक्नुको कठिनाईबारे एफटीएफलाई जानकारी गराइएको छ’-सरकारी स्रोतले भन्यो- ‘प्रधानमन्त्रीकै तहबाट सो पहल भएकाले कानुन पास गर्न थप केही महिनाको समय नेपालले पाउने निश्चीत जस्तै छ ।’

एफटीएफको वैठक अहिले फान्सको राजधानी पेरिसमा बसिरहेको छ जसमा नेपालका तर्फबाट राष्ट्रबैंकका डेपुटी गर्भनर महाप्रसाद अधिकारीले प्रतिनिधित्व गर्नुभएको छ ।

नेपाल नकरात्मक सूचीमा परेमा तत्कालै हटाउन असम्भव हुने र नेपालले अन्तराष्ट्रिय ब्यापारमा घाटा बेहोर्नुपर्ने अबस्था थियो । सदनमा कानुनको मस्यौदा पेश भइसकेको र अथासम्भव छिटो कानुन पारित हुने प्रधानमन्त्रीले कुटनीतिक च्यानलमार्फत प्रतिबद्धता जनाएपछि तत्काल नकरात्मक सूचीमा पर्ने खतरा टरेको स्रोतको दावी छ ।
साभार:अनलाइन